Large %d0%a3%d0%a1%d0%a2%d0%ac %d0%90%d0%9b%d0%94%d0%90%d0%9d%d0%a1%d0%9a%d0%9e%d0%93%d0%9e %d0%a3%d0%9b%d0%a3%d0%a1%d0%90

Түмсүүлээх буоллахпытына, үлэни-хамнаһы кыайыахпыт

Yөрэх
Саха Республикатын Президенэ Е.А.Борисов бу дьыл сэтинньи 12 күнүгэр Уус-Алдан улууһун Курбуһах нэһилиэгэр тутуллуохтаах таас оскуола бастакы атаҕын туруоруу үөрүүлээх сиэригэр-туомугар тыл этиитэ.

– Ытыктабыллаах Курбуhах нэhилиэгин бэтэрээннэрэ, үтүө-мааны үлэhит дьоно!

Нэhилиэк инники кэскилэ – Курбуhах ыччата!
Бүгүн Саха сирин Илин эҥэригэр үтүө күннэр үүннүлэр. Мин үөрүүлээх түгэҥҥэ кытта кэлбиппиттэн улаханнык астынабын, дуорhуйабын. Икки хонуктааҕыта Саха Республикатын Государственнай Мунньаҕар - Ил Түмэҥҥэ, норуотум иннигэр, республика сайдар кэскилин көрөн, дьонум-сэргэм түмсүө диэн бэйэм санааларбын, этиилэрбин, ханнык хайысхаларга үлэлиэхтээхпитин этэн турабын.
Ил Түмэҥҥэ Анал этиибэр кэлиҥҥи кэмҥэ ыытыллар баараҕай бырайыактар тула республика инники сайдыытыгар туох үлэ барыахтааҕын, тугу ситиhиэхтээхпитин бэлиэтээтим. Сахабыт сирин баайын-дуолун табатык туhанарбыт, республикабытыгар олорор сүүстэн тахса омук эйэлээх-түмсүүлээх буоларын түмүгэр сайдыыбыт кэлиҥҥи кэмҥэ биллэ тэтимирдэ. Бу хайысхаҕа ыытыллар үлэни өссө күүһүрдэн, тирэх оҥостор соруктар тураллар.
Тыа сирин үлэhит дьонун култуурата, духуобунаһа үрдүөхтээх, өйө-санаата уларыйыахтаах, экономика сайдыытын саҥалыы торумунан чопчу ыытыахтаахпыт. Ырыынакка киирии эрэйдээх-мускуурдаах кэмнэрин кэннилэриттэн суолбутун-ииспитин тобулунарбытыгар, бородууксуйаны оҥорон, ону батаран, хамнастанан, сайдыы суолугар үктэнэрбитигэр эрэнэбин.
Тыа сиригэр социальнай объектары тутууну кэлиҥҥи сылларга балайда кэҥэттибит. Ол курдук, аҥаардас тыа сиригэр 100-тэн тахса таас оскуола, ону таhынан элбэх атын социальнай объектар тутуллан үлэҕэ киирдилэр. Холобура, бу эһиэхэ, Курбуһахха, аҕыйах сыллааҕыта социальнай харалта дьиэтин туппуппут. Үлэбитигэр-хамнаспытыгар итинник тутуулары сөптөөхтүк туһаннахпытына, ыччаппытын тыа сиригэр олохсуттахпытына, дьоммут-сэргэбит аан дойду сайдыытын кытта тэҥҥэ хардыылаатаҕына, тыа да хаһаайыстыбатыгар үлэни-хамнаһы кыайыахпыт дии саныыбын.
Бүгүн Курбуһах нэһилиэгин үтүө-мааны сиригэр үктэнэн туран, эһиэхэ оскуола саҥа таас дьиэтин тутуу туһунан кэпсэтии балайда уһуннук-киэҥник барбытын бэлиэтиэхпин баҕарабын. Республика үрдүнэн 600-тэн тахса оскуола баар эбит буоллаҕына, 200-һэ таас тутуу, итинтэн 118-һын кэлиҥҥи сэттэ сылга үлэҕэ киллэрдибит. Оскуолалары тутуу биир сүрүн сорук буолар, онон бу үлэ инникитин да салҕаныаҕа.
Эһиэхэ, Курбуһах нэһилиэгэр, саҥа таас оскуоланы тутуу үлэтэ саҕаламмытыгар биир дойдулаахтаргыт үтүөлээхтэр. Ол курдук, Саха Республикатын Государственнай Мунньаҕын - Ил Түмэн депутата, бу оскуолаҕа үөрэммит Александр Николаевич Жирков үгүстүк туруорсубутун бэлиэтиэхпин баҕарабын. Ону сэргэ оскуола тутуллуутугар биир дойдулааххыт Егор Михайлович Аммосов-Мыла уола, сахалар киэн туттар киһибит, билигин Москва куоракка олорор аныгылыы өйдөөх-санаалаах предпринимательбит Александр Егорович Аммосов тирэх буолла. Саха Республикатын Правительствота кинилэр эһиил тутууну бүтэрэр туһунан ылыннарыылаах туруорсууларын өйөөн, оскуола бастакы атаҕын туруордубут.
Республикабыт биир бөдөҥ «Якутцемент» тэрилтэтин салайааччыта, оскуола тутуутун иилээн-саҕалаан ыытыахтаах Алиш Забид-оглы Мамедов бүгүн бэйэтин санаатын олус бэркэ эттэ. Онон эһиил, 2011 сыл 11-с ыйын 11-с күнүгэр 11 чааска саҥа оскуола аана аһыллыахтаах диэн этиэх тустаахпын. Курбуһах дьоно-сэргэтэ, ыччата туораттан кэтээн көрөөччү буолбакка, илин-кэлин түсүһэн көмөлөстөххүтүнэ, үлэлии кэлэр дьону өйөөтөххүтүнэ, ити кыаллар сорук дии саныыбын. Онон, курбуһахтар, түмсүҥ. Саха дьоно түмсүүлээх буоллахпытына, үлэни-хамнаһы кыайыахпыт, күүскэ сайдыахпыт, инники былааннарбытын олоххо киллэриэхпит.
Бу оскуоланы тутан холобур көрдөрөҥҥүт, кэскилгитин оҥостуҥ, кыайыҥ-хотуҥ. Баһыыбаларыҥ!

Усть-Алданский улус