Large lenina

Егор Борисов: «Саҥа производстволары тэрийиигэ туох эмэ толкуй, санаа баар буоллаҕына, өйүүргэ бэлэммит»

От ыйын 16 күнүгэр Саха Республикатын Президенэ Егор Борисов Нерюнгри куоракка дьыалабыай сырыытыгар оройуон актыыбын кытта көрүстэ.

Көрсүһүүгэ Саха сирин Правительствотын Бэрэссэдээтэлин бастакы солбуйааччылара Геннадий Алексеев, Алексей Стручков, СР Президенин уонна Правительствотын дьаһалтатын баһылыга Виктор Ефимов, солбуйааччыта Владимир Кожевников, предпринимательство дьыалатыгар уонна туризмы сайыннарыыга  миниистир Екатерина Кормилицына, СР Торговай-промышленнай балаататын салайааччыта Владимир Членов, СР Президенин уонна Правительствотын дьаһалтатын олохтоох бэйэни салайыныыга департаменын салайааччыта Владимир Черноградскай кытыннылар.
Мунньахха СР Президенэ Егор Борисов муус устар 1 күнүгэр кэлэ сылдьан биэрбит сорудахтарын хайдах толорбуттарын бэрэбиэркэлээтэ. Дакылааты оройуон баһылыгын эбээһинэһин толорооччу Геннадий Ленц оҥордо. Салайааччы үлэ ыытыллыытын туһунан иһитиннэрэн баран, түмүккэ уустук боппуруостары быһаарыыга көмө көрдөөтө. Ол курдук, Хатыми бөһүөлэккэ хочуолунайы тутууну, айылҕа харыстабылыгар үлэни күүһүрдүүнү, «Азия оҕолоро» оонньууларга объектары бэлэмнээһиҥҥэ уонна «Горняк» спорткомплекска емкостары атыылаһыыга  үбү көрүүнү, Нерюнгри птицефабрикатыгар уунан хааччыйар системаны тутууну, аэропорду, Хотугулуу-илиҥҥи федеральнай университет спортсаалатын, инбэлииттэр интернат-дьиэлэрин, Серебрянай Бор бөһүөлэк балыыһатын ыалдьыбыт дьону киллэрэр корпуһун государство бас билиитигэр көһөрүүнү туруоруста.                  
Көрсүһүүгэ тус бэйэлэрэ эппиэтинэһи сүгэр  хайысхаларыгар сорудахтар толоруллууларын туһунан иһитиннэриилэри  СР Правительствотын Бэрэссэдээтэлин бастакы солбуйааччылара Геннадий Алексеев, Алексей Стручков, предпринимательство дьыалатыгар уонна туризмы сайыннарыыга миниистир Екатерина Кормилицына уонна СР Торговай-промышленнай балаататын салайааччыта Владимир Членов оҥордулар.
Маны сэргэ Егор Борисов оройуон нэһилиэктэрин баһылыктарын, доруобуйа харыстабылын, үөрэх тэрилтэлэрин бэрэстэбиитэллэрин уонна олохтоох предпринимателлэр этиилэрин иһиттэ, кинилэргэ бэйэтин санаатын тиэртэ уонна Правительство үлэһиттэригэр туһааннаах ыйыы-кэрдии биэрдэ.
Егор Борисов Нагорнай бөһүөлэк олохтоохторугар дьиэни-уоту тутуу үбүлээһинэ быһаарыллыбытын, ол эрээри дьон көһөрүллэ илигин бэлиэтээтэ уонна ити боппуруоһу быйыл быһаарарга сорудахтаата.
Саха сирин соҕурууҥу өттүгэр тимир рудалаах сирдэри баһылааһын боппуруостарыгар республика баһылыга Геннадий Алексеевка СМИ нөҥүө киэҥ информацияны биэрэргэ, нэһилиэнньэҕэ үлэ үчүгэйдик баран иһэрин, хайа бырайыак ханна, хаһан киирэрин сиһилии быһаарарга сорудахтаата. Итини таһынан  Егор Борисов СР Правительствотын Бэрэссэдээтэлин бастакы солбуйааччытыгар скважиналарга лицензиялары ылыы үлэтин сүктэрдэ.
СР Президенэ Алексей Стручковка Иенгра бөһүөлэгэр олорор дьиэлэри тутууну тэтимнээхтик ыытарга, онуоха бүгүҥҥү балаһыанньаны учуоттаан үлэлииргэ ыйыы-кэрдии биэрдэ.   СР Правительствотын Бэрэссэдээтэлин бастакы солбуйааччытын өссө биир сорудаҕа – Чульмаҥҥа 48-с квартиралаах дьиэ тутуутун үбүлээһинин тохтотуу. Ол төрүөтүнэн бөһүөлэк баһылыга үлэни сатаан тэрийбэтэҕэ буолар.
СР Президенэ баартыйа бырайыактарын олоххо киллэриигэ  болҕомтотун уурда. Республика баһылыга  бу боппуруостары быһаарар туһунан дьаһалы оройуон салалтатыгар уонна  предпринимательство дьыалатыгар уонна туризмы сайыннарыыга  миниистир Екатерина Кормилицынаҕа биэрдэ.
Егор Борисов итини тэҥэ оройуон бюджетнай тэрилтэлэрин дьиэлэрин өрөмүөннүүргэ, олорор дьиэлэр подвалларын туһаныыга, Хатыми бөһүөлэккэ хочуолунайы, Нерюнгри птицефабрикатыгар уунан хааччыйыы систематын  тутууга, кэккэ объектары государство бас билиитигэр ылыыга уонна медвытрезвители үлэлэтиигэ сорудахтаата.
Көрсүһүү бүтүүтүгэр Егор Борисов олоххутун тупсарыы бэйэҕититтэн тутулуктаах, онуоха дьон төһө көхтөөҕө, баҕалааҕа быһаарыылаах күүс буоларын ыйда. «Былаас үптээх-харчылаах, сайдам дьонтон турар гражданскай уопсастыбаны тэрийиигэ бары кыаҕын ууруоҕа,   саҥа производстволары тэрийиигэ туох эмэ толкуй, санаа баар буоллаҕына, өйүүргэ бэлэммит», - диэн түмүктээтэ республика аҕа баһылыга.     

Нерюнгринский улус